Met erkenning aan: HANNES GROVE.
Praatjie voorberei vir Kosmos duiweklub Unie Royal Challenge veiling 2018
Inleiding
Dankie vir die geleentheid
Die wat ons ken sal weet dat ons nie te koop loop met ons prestasies nie – ‘n Ou is net so goed soos jou laaste wedvlug/seisoen
Ek deel graag my ondervinding met julle oor wat ou moet doen om kampioen te word.
In my opinie is dit ‘n legkaart met verskillende stukke wat deel uitmaak van die groter sukses prentjie. As daar ‘n stukkie kort gaan die sukses ontbreek.
Ons het in 2009 in Gauteng begin duiwe vlieg. Die eerste twee jaar het ons skaars die sheet gemaak. Die eerste vraag wat gewoonlik opduik as ou swak vlieg is mos:
Watse muti gebruik die kampioene??? Hy gebruik iets onwettig. Ek sal nooit teen hom kan kompeteer nie.
Gelukkig het mede klublede ons gehelp met beter duiwe en Peet Hartman het ‘n groot bydra gelewer om ons “mindset” te verander. Sy motto is “Keep it simple.” Moeilik om te glo op sigwaarde maar die waarheid. Duiweboere is geneig om die sport onnodig te kompliseer.
Hierna het dit beter begin gaan.
Prestasie agtergrond – afgelope 7 jaar
• 4x Unie jongduif kampioen (2011-2014) – rekord staan steeds
• Unie kampioen (2014)
• Tweede unie punte (2013)
• 2x Unie all bird punte kampioen (2013/2014)
• 14 Unie wenne – 60+ klub wenne
VRAAG: Waaroor jy moet beskik, en wat jy behoort te doen om ‘n kampioen te wees…?
Ek dink ons almal is al moeg vir die cliches soos die volgende:
“Good pigeons”
“Regte hok en ventilasie”
“Regte voeding”
“Gesonde duiwe”
ens. ens.
Hierdie onderwerpe is al baie behandel en genoeg literatuur is beskikbaar wat elkeen in detail bespreek. Ek gaan julle dus nie hiermee verveel nie.
Kom ons praat eerder oor dinge wat jy moet reg doen en dinge wat jy nie moet doen as jy kampioen wil wees.
365 dae ‘n jaar
Jy kan nie 6 weke voor die eerste wedvlug skielike regop spring en paniekbevange na die bottel Furasol en Emtryl gryp nie.
Duiwe verlang aandag en versorging die hele jaar deur. Elke kampioen wat ek al besoek het sorg vir hulle duiwe 365 dae ‘n jaar. Die wedvlugte word in die nespanne gewen. Swak kuikens sal nie kers vashou by die top duiweboer se duiwe nie.
Score in al die wedvlugte
Om punte kampioen te word moet jy punte maak in elke vlug wat gevlieg word. Die top manne score in elke wedvlug. Dit is nie nodig om elke week te wen nie maar die scoreboard moet bly rol. Daar is nie genade vir jou as jy ‘n wedvlug mis nie. Die punte wat so verlore gaan word baie moeilik weer opgemaak.
Bankers
Die maklikste manier om nie die sheet te mis nie is om bankers te he. Hierdie is duiwe wat jy laai met vertroue dat hulle gaan score. Bankers is nie noodwending altyd eerste terug by die hok nie maar hulle is ook nie ver agter die eerstes nie. Dit is daardie duiwe wat altyd plekke vlieg en punte maak. Die “Toyota’s” van die duiwesport.
Dit is egter baie maklik om te se jy moet bankers he maar waar en hoe kry ou hulle? Seleksie. Punt. Selekteer in jou broeihok rondom die duiwe wat kuikens teel wat konstant presteer. Die uitskieter unie wenner is vir ons minder werd as die duif wat weekliks sy kant bring maar nog nie ‘n race kon wen nie. Dit is hulle wat die punte trofee huistoe bring.
Gewig!
In my opinie is swaar duiwe die meeste duiweboere se probleem op die kortpad. Al daardie binnevet van lekker vreet in die verveer. Dan voer pa nog alte lekker in die wedvlugseisoen ook. Jy kan maar die uitslae dophou – die swaar voerders met swaar duiwe vlieg gewoonlik goeie plekke as dit ‘n verskriklike moeilike vlug is. Gewone mooiweer vlugte sukkel hulle om voor te klok.
Waak daarteen om jou duiwe te swaar te laat word in die verveer. Probeer hul gewig afkry deur oefening en jou kosmengsels aan te pas. Ons sit tot 50% sonneblom by op die kortpad om die gewig te probeer reg hou. Jou metode van voeding speel ook ‘n groot rol. Op die kortpad voer ons tot die 4de duif gaan water drink – dan het hul genoeg gehad. Dit is ook belangrik dat jou voeding en oefening in balans is. As jy baie padwerk gee sal jy swaarder moet voer om in die energie behoefte te voorsien.
Pasop om nie uitgehongerde duiwe te vlieg nie – jou seisoen kan baie vinnig tot ‘n einde kom as daar ‘n paar tawwe vlugte is. Daar is ‘n lang seisoen voor en mens moenie die duiwe uitbrand deur ondervoeding nie.
Hou jou ore op die grond.
Luister wat die top manne gesels. Deur te luister kan jy waardevolle inligting bymekaar maak.
Voorbeeld 1: Watter siektes is in omloop?
Dit is ongelukkig die realiteit van ons sport dat as een duiweboer ‘n siekte in sy hok opdoen is die kans goed dat dit deur ander hokke gaan versprei. Die kampioen onderskei homself hierin dat hy vroegtydig so ‘n siekte kan identifiseer en stappe kan neem om die impak te minimaliseer of selfs heeltemal te vermy. Luister fyn en lees tussen die lyne. Die kampioen gaan punte maak want hy kon pro-aktief optree deur te luister.
Voorbeeld 2: Watter bloedlyne presteer?
Indien ‘n kampioen wil kampioen bly moet hy aanhou streef na beter duiwe. Duiwe wat sy hok sal verbeter. Waardevolle inligting rondom watter rasse presteer kan gratis bymekaar gemaak word deur bloot te luister na wat die manne gesels om die braaivleis vure.
Moenie jou ore uitleen nie
Die top duiweboere leen nie hulle ore uit nie. Hulle is konsekwent in dit wat hulle doen. Die reseppies wat om die braaivleis vure gedeel word is nie iets wat hulle die volgende dag gaan probeer nie. Menige duiweboer sink hulself weekliks deur te spring van Piet dan Paul en dan Koos se raad. Dit werk nie! ‘n “Flash in the pan” miskien maar nie volhoubare uitslae nie.
Vriende in die sport
Die kampioen duiweboere het almal ‘n netwerk vriende in die sport. Niemand weet alles nie en dit is goed om jou idees te toets met ander duiweboere. Baie keer mis jy die detail en ‘n ander se siening maak dat dinge sin maak. Veral as die duiwe nie presteer soos jy wil he nie, is dit goed om jou duiwe vriende se opinies te vra – hulle tel gewoonlik iets op wat jy heeltemal mis gekyk het.
Observeer
Duiwe vertel jou ‘n storie. Jy kan baie uitwerk deur bloot te let op jou duiwe se optrede en kondisie.
Lyk hulle lewendig of tam? Blink die vere? As hulle vreet – is daar eetlus. Dalk te veel eetlus – honger. Watter sade vreet hulle eerste?
Trek hulle lang nekke en sukkel om te sluk – kanker? – swamme?. Hoe lyk die droppings / mis? Pap – iets nie reg. Grootte van mis bolletjies – te groot dan voer jy te swaar.
As jy ‘n bad uitsit – bad hulle? Gesonde duiwe bad behalwe as die weer vreeslik sleg is.
Kroppe in die oggend. Moet leeg wees – anders probleem! Vere moet sag wees.
As hul terugkeer van vlug – Tippy toes. Dalk nie genoeg water gedrink nie – sit jy dalk iets bitter in die water dat duiwe te min drink en dehidreer. Dalk mineraal/sout tekort wat krampe veroorsaak?
Kop skud as hul terugkom (dalk asemhaling probleem of bloot stowwerige dag? Of dalk het jy kanker pilletjie gegee?).
Moenie oorreageer en onnodig foute soek nie – bly kalm
Dinge gaan nie altyd reg loop nie. Daar gaan iewers ‘n probleem opduik wat jy sal moet aanspreek. Dit help egter nie jy gaan haal die bobbejaan agter die bult nie!
Sommige vlugte gaan jy nie voor klok nie. Dit beteken nie daar is fout met jou duiwe en dat jy onmiddelik muti moet gooi nie. Lees die vlug. Observeer. Besluit dan of daar fout is aldan nie. Blindelingse behandeling na ‘n swak vlug doen gewoonlik meer skade as goed.
Bly kalm. Praat met jou vriende en besluit dan wat jy gaan doen.
Moenie te hard probeer nie – “less is more”
Dit help nie jy ruil die water 3 keer per dag om net al die verskillende muties deur die duiwe se stelsel te probeer kry nie. Keep it simple. Moenie die arme duiwe bombardeer met al die goed bemarkte duiwe middels nie. Die meeste van die tyd het hulle net skoon water nodig.
Ons is geneig om te dink die wen le in die bottel. As jou duiwe se gesondheid nie reg is nie, dan sal medikasie help. Anders gaan dit niks help nie. Jy troos jouself dat jy iets gegee het maar die arme duiwe baat nie noodwendig daarby nie. Jy is besig om hulle immuniteit te verswak en hul organe onder druk te sit.
Antibiotika wat onverskillig toegedien word veroorsaak dat die organismes weerstand daarteen opbou en so raak dit al moeiliker om die organismes te beheer. Sterker en sterker antibiotika moet gebruik word en so skep ons vir onself ‘n groot probleem. Die goeie bakteriee word gewoonlik saam met die slegtes gedood wat beteken die duif se spysvertering stelsel balans word versteur. Boonop moet die organe al die stowwe uitskei wat moontlike skade kan veroorsaak.
Dus moet jy slegs medikeer as daar fout is. Die beste is om veearts opinie te kry as jy vermoed daar skort iets. Blindelingse behandeling kan dalk die teiken mis en meer skade veroorsaak. Soos vroeer gese – hou jou oor op die grond – baie keer is die siekte reeds in omloop en die oplossing is voor-die-hand-liggend.
Beplan
Beplan jou seisoen vooraf. Watse kos gaan jy gebruik? Hoe lyk jou oefenprogram? Hoe groot gaan jou span wees – is dit genoeg om die wa deur die drif te trek? Dit help nie jy vlieg jou duiwe weekliks en dan as die harder vlugte kom val jou vere uit nie. Oordeelkundige vlieg van duiwe help dat jy die hele seisoen kan kompeteer met ‘n kleiner span duiwe.
Sommige duiweboere fokus op die kortpad. Hulle duiwe is dus al op vorm twee weke voor die eerste wedvlug. Hierdie duiwe se vorm gaan nie die hele seisoen hou nie en dit gaan moeilik wees om die punte te wen. Beplan dus rondom wat jou fokus is en wanneer jou duiwe op hul beste moet wees.
Kweek leiers nie volgers nie
Duiwe is groep diere. Hulle verkies om saam met mekaar te vlieg eerder as op hul eie. Die rigting waarheen hulle vlieg word bepaal deur die leier van die pak. As daardie leier van die pak jou duif is, is die kans mos beter dat die pak in jou hok se rigting sal vlieg!
Dus moet jy leiers probeer kweek. Duiwe wat die voortou kan neem. Dit is makliker gese as gedaan. Ek dink genetika speel ‘n groot rol hier – jy kan tog nie verwag dat die vetste seun in die skool die 100 meter moet wen nie. Dus is die regte genetika duif die belangrikste.
Hierna kan jy probeer om leiers te kweek deur:
1. So gou as moontlik nadat padwerk begin het die duiwe mandjie mandjie loslaat. Dus in plaas van een duif wat die pak huistoe neem word daar nou onmiddelik 5 of meer duiwe gedwing om te dink en die pak te lei huistoe.
2. Die duiwe gereeld in groepies van 5 of minder los te laat. Presies dieselfde beginsel geld – duiwe word gedwing om te dink en self die pad huistoe te kry. Ek los nooit duiwe 1-1 nie. Daar is nie vir my voordeel daaraan nie aangesien die duif maar so op sy eie huistoe ploeter sonder om deur ‘n maat of maats te race. Koers kies onder kompetisie/druk is meer werd.
3. Selekteer streng. Kap die stert af want dit hou die kop terug. Het jy al gesien hoe ‘n pak omdraai vir een agter-vlieer? Of hoe een duif jou hele pak terug trek hok toe as hulle moet oefen? Raak onstlae van daardie duiwe – hulle jou terug. Slyp jou atlete as ‘n groep saam. Hulle moet leiers wees nie volgers nie. Hoe meer leiers daar is hoe beter is die kans dat jy ‘n duif in die voorste pak gaan he.
Pasop vir proefkonyn wees
‘n Nuwe “wonder” middel kom op die mark en jy dink “hier’s hy nou!”. Wenne by dosyne. Dadelik word jou duiwe daarop gesit en die verwagting is hoog. Maar helaas die uitslae is nie na verwagting nie… Inteendeel dit gaan maar broekskeur.
So paar jaar gelede het ‘n middel van oorsee op die plaaslike mark gekom. Jy sit dit daagliks in die water. 7 dae per week. Dan kry jy nie siektes nie en jou duiwe is in top vorm. Ek het toe die produk getoets in een van my hokke. Saterdag kom daardie duiwe met niks “landing gear” by die huis aan. “Crash landing” na “crash landing”. Die volgende week hou ek hulle toe dop as hulle water drink – die goed is so bitter dat die duiwe skaars water drink. Hulle dehidreer hulself heeltemal en dit is dan die rede dat die voetjies so styf trek.
Nog ‘n voorbeeld is nuwe entstowwe wat nog nie ordentlik in kampioen hokke getoets is nie – ek is versigtig om die proefkonyn te wees. ‘n Paar jaar gelede was daar groot klomp duiweboere wat ‘n stel met entstowwe afgetrap het en so is daardie seisoen van hulle ruineer. Ek wag maar altyd dat die entstof goeie resensies kry voordat ek dit gebruik.
Moenie vir jouself lieg nie
Ons as duiweboere is geneig om verskonings te soek as die prestasies nie na wense is nie. Ons soek oral na hierdie verskonings behalwe in ons eie agterplaas. Die kampioene is eerlik met hulself.
Ek haal vir Peet Hartman (6x unie kampioen) aan: “Saterdag na Saterdag as ek vir my duiwe wag dan sien ek duiwe oor my hok vlieg maar ek klok niks. Ouens agter my klok maar ek klok niks. Is daar ‘n verskoning dat ek nie klok nie? Is dit my hok posisie? Nee. Ek het nie ‘n duif in daardie voorste pak nie – ek moet iets doen om ‘n duif daar te kry.” En dit het Peet gedoen. Daarna was hy 6x unie kampioen.
Verskonings is volop. Die punt is as iemand in jou area ‘n duif uit die voorste pak kon klok dan moes jy ook kon klok. Punt.
Onthou dat daar baie ander duiweboere is wat dieselfde of selfs meer moeite as jy doen.
Geloof
Laastens. Glo dat jou voorbereiding reg was en dat jy God se seen op jou uitslae kan verwag.
SPREUKE 21:31 “Die perd word reggemaak vir die dag van die geveg, maar die oorwinning is deur die HERE”